أهلاً وسهلاً بكم داخل بلاد الرقص وَ المجون
أستمتعوا فـ أن المتع كثيرة هنا !

السبت، 15 مايو، 2010

وشوشات أنثى الموسلين " 1 "




مقدمه . .

وشوشات أنثى الموسلين مختلفة شوي . .
رح تكون هالوشوشات باللهجه العاميه . . وبتحاكي الكبير والصغير . . العشقان ويلي بدوا يعشق . .
الفرطان من العشق ويلي بدوا يفرط . . ويلي قلبوا كبير ويلي قلبوا صغير . .


مارح طول بالمقدمه . . مع أني فكرت فيها كتير . . ورتبتها مبارح وأنا ع سريري . .
بس كل شيء طار لما فقت من النوم وبلشت أكتب . .


بدي قول . .
كل عاشق بيفكر مبارح كان أحلى . . بس يلي مابيعرفوا أنو بكرا أحلى من مبارح . .


وبدي قول . .
اللحظات الحلوه بتمر بسرعه . . لهيك مالازم نضيع اللحظات الحلوه بالخناق والعتب . .
مع أنو بيقولوا على قد المحبة بيجي العتب . .


وبدي قول . .
أنو أنا بعشق . . ويلي عاشقتوا بيجي لهون . . بيسمع هالوشوشات . . بيبتسم شوي . .
وبيقول " يا مجنونه " العالم اشتلقت علينا . .
وأنا بقله كل هالعالم مابيهموني . . أنتا وحدك يلي بتهمني . .


معنا أتصال . .
- ألو
- ألو مرحبا
- مراحب
- أنا من عشاق هالوشوشات . . وكل يوم بسمعها . . وبتمنى حبيبي يسمعها . .
بدي وشوشه منك يا أنثى الموسلين . . رح خبيها بقلبي وخبرها لحبيبي . .
- اممممممم
وشوشتي بتقول : لما بتمسكلي أيدي . . بضيع . . وبحس أصابيعك أصابيعي . . بحس بدمك يلي بيجري بشرايينك . .
وبتمنى ما فيق . . وما تشيل أيدك من أيدي . .
- ميرسي ع هالوشوشه . . رح خبيها بقلبي . .
- أهلاً وسهلاً . .


وبعد هالأتصال . .
بدي كفي أقوالي . .


بدي قول . .
أنو الدنيا صغيره كتير . . بتفرق وبتجمع . . وبين هالاتنين مفرق . . مفرق ضيق كتير . .
نحن وحدنا يلي بنختاره . . ونحن يلي بنتحمل نتائج هالاختيار . .


وبدي قول . .
أنو ازا ما زبط معنا هالمفرق . . فينا نجرب مفرق تاني . .
الحياة الحلوه مابتتوقف ازا حبيب فل من قلبنا . . ومن جسدنا . . ومن عقلنا . .
الحياة الحلوه نحنا يلي بنصنعها . . بجنونا بنصنعها وبنخليها حلوه . .


أوقات بنحس بحالة ضياع !
وأوقات تانيه بنحس أنو الدنيا ماعم تسعنا من الفرحه . .
جربوا تعيشوا بين هالحالتين . .
جربوا تمزجوا الحياة الحلوه بشوية مراره . .
الدنيا مش سكر ع طول . . ومش ملح ع طول . .


بتمنى هالوشوشه تكون خفيفه وحلوه . .
وبلاقيكم بمساء تاني . .
أنتظروني . .

1 : 7 م

22 مارس \ 2010 م



ليست هناك تعليقات:

إرسال تعليق